|
O sábado 13
de setembro foi o día no que membros da asociación e voluntarios
deron por concluídos os labores de limpeza programados para estas IV
Xornadas, nas que se lle prestou unha especial atención ao afluente
do Furelos, o río Catasol, tan castigado nos últimos tempos por
vertidos de zurro e de alcatrán.
Nesta derradeira xornada recolléronse arredor de 100 quilos de lixo
do río Furelos, envases, vidro, plásticos, algo que semellaba unha
manta ou unha alfombra de grandes dimensións... O certo é que as
catorce persoas que participaron, membros da asociación e dous
voluntarios chegados de Santiago, puideron comprobar que a idea de
que os ríos non deben ser contedores de lixo parece que vai calando
cada vez máis na xente.
Pola tarde rematáronse os labores rozando arredor de cincocentos
metros arredor da praia fluvial, momento no que recibimos a visita
do concelleiro de Medio Ambiente do concello de Melide, Manuel
Prado.
Non faltou un cumprido xantar campestre á beira do Furelos, no que
foi moi comentado o programa da Radio Galega “Ríos e Montes” emitido
precisamente esa mesma mañá, no que Xavier Pazo e Xan Pérez como
representantes da Asociación compartiron estudio co profesor
Fernando Cobo e, vía telefónica, con Pepe Casal, preparador físico
da Selección Española de Baloncesto que acaba de gañar a prata nos
xogos de Pequín, gran afeccionado á pesca e, casualmente, o primeiro
en alertar sobre a presenza de lampreas no encoro de Portodemouros.
A todos os que non tivesen oportunidade de escoitar o programa
recomendámoslles que o fagan a través da páxina da Radio Galega en
internet (www.crtvg.es), dado que nel se trataron os desastres do
Catasol, ao tempo que o Profesor Fernando Cobo deu conta das
investigacións levadas a cabo por el e o seu equipo nos últimos
cinco meses, para desentrañar a inexplicable presenza de lampreas no
río Ulla máis arriba do encoro de Portodemouros. Á falta de concluír
o traballo, a hipótese máis plausible para el é que as lampreas
foron introducidas dalgún xeito por alguén. O risco non é grave a
non ser que estas colonias de lampreas, (tres de diferentes idades)
sexan quen de completar o ciclo vital nas augas do Ulla,
converténdose daquela nunha especie invasora que cumpriría
erradicar, tal como ocorreu nalgunhas lagoas de Canada e EEUU.
Desde aquí o noso agradecemento ás gabanzas expresadas polo profesor
Cobo e polo medallista, Pepe Casal, por valorar de maneira
encomiable o noso traballo a prol da conservación dos ríos. Parabéns
e agradecementos, por suposto, ao director do programa “Ríos e
Montes”, Miguel Piñeiro, polo interese e seguimento que fai do
traballo da nosa Asociación.
Coma sempre, grazas a todos os que participaron ou fixeron posible a
celebración destas IV Xornadas de Limpeza.
Asoc. Troiteiros “RIO FURELOS”
de Melide
www.riofurelos.es
Melide,
15 de Setembro de 2008 |
