XIV CONCURSO DE PESCA CIDADE DE NARON     
Por Eloi Saavedra

Certame atípico en canto a capturas xa que só dous participantes cobraron dúas pezas de talla legal.

O gañador foi José Manuel Pena cunha peza de 900 gr que lle deu así mesmo o premio á peza maior.
O segundo clasificado foi Gumersindo Rodríguez.
Xa fora de concurso, pola tarde, cobráronse algunhas pezas, pero sen capturas destacables.
Non foi unha xornada de pesca para botar foguetes, pero se acadaron os obxectivos do concurso que eran o desenvolvemento dunha xornada de convivencia entre os socios e as súas familias.
É evidente que as condicións meteorolóxicas pasaron factura e a demostración foi a tromba de auga caída pola noite que incluso afectou o desenvolvemento da pesca na xornada do domingo.
O próximo concurso programado será o Concurso Social de Mosca, a disputar o 12 de xullo e no que a única modalidade permitida será a mosca e será organizado na modalidade sen morte.

Destacar tamén ás boas condicións nas que se atopa o río para o exercicio da pesca, en canto a limpeza de marxes, tralos traballos de repaso de sendas de pesca realizados polo equipo da Consellería de Medio Ambiente, así como polas limpezas puntuais (concretamente nas zonas de Entreríos e Fabián-Piscifactoría) realizadas por socios desta sociedade. Estes traballos terán continuidade en meses próximos cun aplomado de arborado na zona do cauce baixo do río (abaixo da Presa do Rei) e cunha restauración de  frezadeiros en varios tramos do río que será desenvolvida tamén por socios desta entidade. Estes traballo están autorizados polo Servicio de Medio Ambiente e por Augas de Galicia.
Tamén destacar os efectos benéficos da nova escala de Presa do Rei que está a demostrar que con ou sen riadas é posible que os reos acaden a parte media do Xuvia, incluso ata Pedroso, a primeiros da tempada. A nosa noraboa a Medioambiente por esta actuación, pois pensamos que é de xustiza dar a cada un o seu recoñecemento.
Polo demais lamentar que determinados focos e contaminación presentes no tramo de San Sadurniño continúen activos, sen que ningunha autoridade competente tome cartas no asunto.