MEDIO RURAL APOSTA POLA RECUPERACIÓN DO SALMÓN ATLÁNTICO NOS RÍOS GALEGOS

- O conselleiro Samuel Juárez asistiu hoxe á solta de 5.000 alevíns de salmón no río Lérez, ao seu paso polo concello pontevedrés de Campo Lameiro.

- Juárez destacou a importancia da recuperación do salmón en Galicia e explicou que neste ano soltaránse un total de 265.000 alevíns desta especie nos ríos salmoneiros galegos.

- O conselleiro salientou en particular a importancia do Centro Ictioxénico de Carballedo nos traballos de conservación en Pontevedra.


Santiago, 18 de novembro de 2011.
A Consellería do Medio Rural aposta pola recuperación e posta en valor do salmón atlántico nos ríos galegos. Na provincia de Pontevedra -xunto coa de Lugo– concéntranse as poboacións máis importantes dentro da nosa Comunidade. Así o salientou hoxe o conselleiro Samuel Juárez na solta de 5.000 alevíns desta especie no río Lérez ao seu paso polo termo municipal de Campo Lameiro, acto no que estivo acompañado polo delegado territorial da Xunta en Pontevedra, José Manuel Cores Tourís, e polo director xeral de Conservación da Natureza, Ricardo García-Borregón, entre outras autoridades.
O titular de Medio Rural destacou a importancia da recuperación do salmón atlántico en Galicia en xeral e de xeito particular no Lérez, e explicou que entre 1997 e 2009 soltáronse neste río un total de 850.000 xuvenís desta especie.

Plan de recuperación
Segundo explicou Samuel Juárez, hai que ter en conta a enorme a sensibilidade desta especie no límite do seu hábitat sur (dentro de Europa). De aí que se deseñara e se estea aplicando pola Xunta un ambicioso Plan de recuperación do salmón. No caso específico do Lérez, as principais accións que se levan a cabo son a mellora da accesibilidade, medidas de redución da mortalidade por pesca e un programa de mellora das poboacións mediante repoboacións con individuos de orixe autóctona (como a realizada hoxe).
O conselleiro salientou ademais o éxito do Servizo de Protección da Natureza (Seprona, da Garda Civil) e dos axentes da Dirección Xeral Conservación da Natureza na loita contra o furtivismo, que supón unha ameaza para esta e outras especies piscícolas.

Centro Ictioxénico de Carballedo
En relación coa recuperación desta pesqueiría, Juárez falou tamén en Campo Lameiro da necesidade do reforzo das repoboacións de salmón autóctono nados nas piscifactorías galegas, neste caso no Centro Ictioxénico de Carballedo, que constitúe unha parte fundamental dos traballos de conservación desta especie en Pontevedra e que ven realizando un importantísimo labor neste sentido. Así, o conselleiro dixo que desde 1997 tódolos salmóns soltados desde Carballedo van marcados, o que permite realizar un axeitado seguimento das poboacións, grazas tamén ao labor das estacións de control de peixes migratorios, o control das pesqueirías, os inventarios piscícolas e a colaboración con universidades e organismos nacionais e internacionais.
De feito –engadiu– de todos os exemplares soltados desde 2002 ata hoxe recapturáronse preto de mil adultos, obténdose tamén recapturas no mar, algunhas delas mesmo en lugares tan afastados como Groenlandia (a 4.000 quilómetros de Galicia) ou no Mar de Noruega.
Toda a información recompilada pola Consellería indica que as repoboacións realizadas nos ríos de Pontevedra contribuíron de xeito notable á recuperación que desde o ano 2000 se detectou nestes ríos, tralo severo declive sufrido a finais dos anos 80. A produción de salmón neste centro de Carballedo durante os últimos 13 anos case acada os 2 millóns de exemplares, e nos últimos 5 anos soltáronse entre 100 e 276 mil xuvenís en distintas fases, salientando o notable nivel de supervivencia, que nos últimos anos rolda o 70%.
En relación con este centro ictioxénico, o traballo cara ao futuro pasa, segundo o conselleiro, por consolidar o establecemento de liñas de cultivo de troita autóctona, continuar co estudo da viabilidade das repoboacións con reo e afianzar o seu papel como banco de xenes vivo.

Capturas de salmón
Juarez deu conta neste acto de que a pasada tempada se cumpriu o cupo de capturas nos ríos salmoneiros galegos, cun total de 169 exemplares (algo máis do dobre que nas de 2009 e 2010). Dixo ademais que nesta campaña vanse soltar en tódolos ríos galegos arredor de uns 260.000 xuvenís de salmón, a maioría (uns 230.000) nos ríos de Pontevedra, e deles uns 125.000 especificamente no Lérez.
Canto á tempada de 2012 de salmón, o conselleiro avanzou que se prolongará dende o 1 de maio ata o 31 de xullo e non haberá modificacións no cupo de captura en relación coa campaña anterior en ningún río galego.

volver a índice de especiales