|
O Río Xuvia con
167 capturas de reo, entre os primeiros de Galicia
Finalizada a
tempada de pesca 2007 a Sociedade de caza e pesca Xuvia pretende facer
unha reflexión acerca dos acontecementos mais relevantes que marcaron o
desenrolo da mesma.
En primeiro lugar hai que destacar que si algo caracterizou esta tempada
foi o alto grado de variabilidade que presentaron as circunstancias
meteorolóxicas, factor este que indubidablemente marcou o ritmo das
capturas. Está claro que a partires do mes de Xullo, no que esta
variable se estabilizou, as capturas non tardaron en chegar. E si ben
nunca se pesca todo o que un quixera, hai que sinalar que durante os
meses de verán, fixéronse a mosca pescatas que recordaban a tempos
pasados, que contrastaban cun inicio de tempada bastante floxo.
Por outro lado hai que sinalar que hai un elemento que posiblemente
distorsionou o ritmo de capturas no couto e que foi o inicio das obras
do paso de peixes da Presa do Rei, que si ben indubidablemente axudou a
aumentar a densidade de peixes na zona baixa do río, por outro lado
dificultou a pesca nesta zona baixa do río polo efecto do stress nos
reos presentes nestas altas densidades. Este efecto, incluso coa escala
antiga en uso xa era coñecido para os pescadores do Xuvia dende hai anos
pois a operatividade da escala era moi limitada en situacións de augas
baixas.
Por outro lado, a dispoñibilidade de caudal ecolóxico no tramo
comprendido entre a Presa do Rei e a restitución de augas da canle de
Galicia Textil é irrisoria, có que a distancia real para a práctica da
pesca neste tramo baixo redúcese moito.
Esperemos que estes dous factores sexan algo do pasado agora que xa
funciona o novo paso de peixes. Esta obra, por outro, lado repercutirá
nun mellor coñecemento da dinámica das poboacións de peixes migradores
no río Xuvia, por canto vai dispor dun mecanismo contador de peixes, co
que as suposicións obtidas a partir de extrapolacións de datos de
capturas, rematarán en canto dispoñamos de datos reais.
En canto ó dato de capturas sinalar que por moitos motivos,
fundamentalmente a ausencia real de gardería nos últimos anos no río na
tempada estival, por estar destinados a incendios, os datos
(interpretados tendenciosamente) apuntaban a un desastre poblacional das
existencias de reos na cunca do Xuvia. Defraudando estas análises
apocalíticas os datos de capturas deste ano (167 peixes, recordamos)
fálannos dunha poboación moi estable de reos nesta cunca, que se
completa cunha presencia testemuñal de salmón (tres exemplares
detectados no ano pasado, un neste ano, e citas de capturas de alevíns
desta especie por toda a cunca do Xuvia), que evidentemente non podían
ser mensurados nos boletíns de capturas por non haber gardería dedicada
a este traballo. Pois ben, aínda empezando a súa dedicación con retraso
(o guiado sistemático comezou no mes de xullo) os resultados están á
vista. Unha felicitación para o bon facer do Sr Hermida, que aparte está
a poñer no seu sitio a determinados elementos que fan da pesca con
ventaxa (vedados, pesca con retropala... Si, si, con retropala, leron
ben) un arte. Esperemos que as sancións conseguintes teñan o efecto
corrector preciso.
A conclusión é que non había tan poucos reos o ano pasado, nin tantos
este, e que os datos numéricos son todo o asépticos que queiramos. A
realidade e que o Xuvia está soportando as agresións dun malentendido
progreso cunha fortaleza que abraia.
Outro tema no que queremos entrar é o de aqueles que facendo uso do
couto de pesca sen morte de San Sadurniño, estanse a dedicar ó seu
esquilmado sistemático, privando ós demais afeccionados que o usan do
seu lexitimo dereito a divertirse. En fin, que antes ou despois as
sancións os poñeran no seu sitio.
Aparte destes datos de capturas guiados, e moi importante ó noso xuízo a
cantidade de peixes pequenos (1 ano de mar) que se avistaron e pescaron
no río, e evidentemente se voltaron á auga en razón da súa pequena talla
( 24-27 cm) que non acadaba a talla legal de captura. Estes peixes xa
eran visibles na época do descenso ó mar durante o ano pasado, cando
eran visibles grandes cardumes dos mesmos. Esta cantidade de peixes
pequenos é un factor que nos permite mirar cara ó futuro con esperanza e
alonxarnos das previsións apocalíticas que algúns verteron mediada a
tempada.
Pero non todo ían ser boas noticias, esperamos que estes bos resultados
da tempada non fagan que as diversas administracións competentes se
volten optimistas en exceso, e non esquezan os problemas graves que ten
o río, coma son:
- Contaminación difusa por pequenos vertidos domésticos, granxas, puríns,
fertilizantes agrícolas e fitosanitarios mal aplicados.
- Contaminación crónica de pequenos núcleos, no caso de San Sadurniño en
vías de solución có funcionamento dunha nova depuradora.
- Contaminación industrial (Intasa)
O feito é que a pesares de que todos estes factores veñen de antigo,
polo momento os pescadores esperamos que se lles poña remedio.
Agora como tema mais apremiante, somente queda esperar que a escala
cumpra o seu cometido e que o gran número
de peixes
que sobreviviron á tempada de pesca, ascendan río arriba a completar o
seu ciclo vital.
Sociedade Caza e Pesca Xuvia. |
