Coa asistencia de numerosas personalidades da vida social e deportiva de Galicia, celebróuse a primera gala dos PREMIOS GALICIA DE XORNALISMO DEPORTIVO 2005 en Santiago de Compostela.
Os diversos premios e recoñecementos foron entregados polo Vicepresidente da Xunta, Anxo Quintana, o Secretario Xeral para o Deporte, Santiago Domínguez, polo Presidente da Federación Galega de Prensa Deportiva, Juan Guillín e pola Presidenta da Federación Española de Periodistas Deportivos, Mari Carmen Izquierdo.
En primeiro lugar entregáronse os premios á “Traxectoria xornalística” que recaeron en Xosé Manuel Gordillo, Xesús Rodríguez, Xosé Manuel Fernández e Manuel Hernández.

Posteriormente á entrega dunha placa a El Corte Inglés pola sua colaboración co deporte, se entregaron os cinco premios nas categorías de Prensa escrita, Radio, Audiovisual, Fotografía e Internet.
O gañador de PRENSA ESCRITA foi “XORNAL DxT CAMPEON”. A gañadora no apartado de FOTOGRAFÍA foi MONICA FERREIROS do Diario de Arousa. En AUDIOVISUAL o programa “EN XOGO” de Tvg. En RADIO o programa “GALICIA EN GOLES” de Radio Galega.
Por último, en INTERNET, Premio á Web de Pesca persoal de MIGUEL PIÑEIRO. O xurado tivo en conta a promoción desde Galicia do deporte da pesca representando esta web un icono informativo a nivel nacional sobre este deporte.

Coa intervención do Vicepresidente da Xunta rematou o acto.
Posteriormente tódo-los premiados e invitados compartiron un animado Viño Galego.

Miguel Piñeiro recibindo o galardón de mans do Secretario
Xeral para o Deporte, Santiago Domínguez

Miguel Piñeiro con Xesús Lodeiro

Autoridades

Intervención de Miguel Piñeiro:

Boas noites. Moitas grazas.
Pois resulta que non todo vai ser fútbol…
Nóraboa ós colegas premiados e en especial á Federación Galega da Prensa Deportiva pola feliz iniciativa destes premios que prestixian e dinamizan a profesión no noso País como asimesmo pretende facer este portal de Internet de xornalismo libre sobre a realidade da pesca fluvial no cunqueirano “Pais dos Mil Ríos”, feito desde Galicia para todo o mundo con moitos dos seus contidos en galego.
Como Webmaster deste foro de pesca, quero agradece-la colaboración dos mais prestixiosos profesionais do xornalismo especializado nacional como Juan Delibes, Rafael del Pozo, Joaquín España, Emilio Fernández Román, etc, e aos directores das Revistas especializadas, a decana Caza y Pesca, Jara y Sedal, Trofeo Pesca, Ferder Pesca, Dánica, Solo Pesca e Adecap, polos seus artigos, comentarios, fotos e impagables aportacións.

No canto á participación de profesionais galegos, vaia o meu agradecemento a todos, que quero personalizar e representar no xenial Doutor Juan José Moralejo, o meu amigo Pepe Casal con quen o sector da pesca continental está en permanente débeda, o excepcional xornalista gráfico Antonio Hernández de El Correo Gallego -privilexio de instantánes e panorámicas de pesca- e a Paula Vilariño de El Progreso de Lugo polo seu traballo e ilusión.
O mundo da pesca continental en Galicia non pasa polo seu mellor momento e quero aproveita-la presenza do Vicepresidente da Xunta de Galicia para expoñer o que considero unha xusta reivindicación. O seu goberno, Sr. Quintana, está artellando a normativa para a vindeira campaña de pesca continental e as drásticas medidas que van tomar -recortes nos dereitos dos pescadores, en definitiva- representan a vulneración dun sector que fai País a cotío cos nosos permisos, licencias, coutos, xantares, desprazamentos, aloxamentos e outros gastos.
Non esqueza que ademais de nós, os pescadores, están as armerías, as tendas de pesca, os proveedores, hoteis, restaurantes, casas de turismo rural, surtidores de combustible, etc; un sector que activa e aglutina a  cen mil galegos con licencia de pesca.
Rafael del Pozo dí que un río con salmónidos é sinónimo de calidade de vida.
Ainda que personalmente comparto moitas medidas encamiñadas á pesca sostible, reclamo de vostedes, Sr. Vicepresidente, que se preocupen tamén de limparen os nosos ríos, de reduciren a contaminación, de vixia-los caudais ecolóxicos, de combati-lo o furtivismo, de suprimi-los puríns e outras inmundicias dos ríos galegos. Nós saberemos agradecelo.
Sr. Quintana, tome boa nota desta reclamación e interésese mañá mesmo por ela. Vostede foi Alcalde de Allariz, din que colleu un río cheo de porquería e que o deixou en aceptables condicións.
Preocúpese por esta reclamación que lle fago en nome de moitos pescadores de Galicia, porque é xusta e -dígolle esto con todo o agarimo- non vaia a ser que agrome un “Nunca Máis Troiteiro” –nós tamén temos dereitos democráticos- que lle revente nas mans a algún Conselleiro do seu Gabinete.
Moitas grazas.

ACTA DO XURADO
“I PREMIO GALICIA DE XORNALISMO DEPORTIVO”

Reunido en Santiago de Compostela, ás 16:30 horas do mércores día 7 de setembro de 2005, nas instalacións do Clube Internacional de Prensa de Galicia, o Xurado do I Premio Galicia de Xornalismo Deportivo, integrado por

D. Eduardo Blanco Pereira, Profesor do INEF (UDC), Membro de Arbitraxe do Comité Olímpico Español e Máster en Dereito Deportivo; D. Miguel Juane Sánchez, Avogado, Máster en Dereito Deportivo, Membro de Arbitraxe do Comité Olímpico Español e Ex-xogador internacional de Baloncesto e por D. Xosé Manuel Vega Gómez, Xornalista e Decano do Colexio Profesional de Xornalistas de Galicia; baixo a Presidencia de D. Juan Guillín Varela, Xornalista e Presidente da F.G.P.D. e actuando como Secretario D. Ricardo Docobo Durántez, Xornalista e secretario xeral da F.G.P.D.

ACORDARON,
por unanimidade, outorgar o “I Premio Galicia de Xornalismo Deportivo” aos seguintes candidatos:

INTERNET
WEB DE MIGUEL PIÑEIRO
O xurado tivo en conta a promoción da Pesca en Galicia, representando esta web un icono informativo a nivel nacional sobre este deporte.

PRENSA ESCRITA
XORNAL DxT CAMPEON
O xurado tivo en conta a súa longa traxectoria cotiá potenciando o traballo xornalístico a prol do deporte galego, e máis concretamente a prol do deporte de base.

FOTOGRAFÍA
MONICA FERREIROS VILA (Diario de Arousa) 
O xurado tivo en conta a súa aportación aos valores deportivos do esforzo persoal, o traballo en equipo e o espírito de superación.

AUDIOVISUAL
PROGRAMA  “EN XOGO” (Tvg)
O xurado tivo en conta o seu compromiso en cumprir un importante servicio ao deporte galego e máis concretamente co fútbol galego.

RADIO
PROGRAMA “GALICIA EN GOLES” (Radio Galega)
O xurado tivo en conta a súa profunda introducción na vida deportiva de Galicia. Co seu nacemento formalizouse outro punto de referencia na información radiofónica deportiva en Galicia.